Misioni vëzhgues i Asamblesë Parlamentare të Këshillit të Evropës (PACE) ka vlerësuar zgjedhjet parlamentare të 9 shkurtit në Kosovë si gjithëpërfshirëse dhe paqësore, duke theksuar se procesi zgjedhor ishte cilësor. Sidoqoftë, ata vunë në dukje se përfaqësimi i grave në këto zgjedhje mbetet i ulët. Petra Bayr, shefe e delegacionit të PACE, u shpreh se, megjithëse zgjedhjet ishin të suksesshme, ka pasur një ndikim të rëndësishëm nga gjuha e urrejtjes online ndaj grave, çka ka penguar pjesëmarrjen e tyre më të madhe. Përveç kësaj, në zgjedhje morën pjesë shumë parti nga komunitetet pakicë, përfshirë gjashtë parti nga pakica serbe, duke përfshirë Listën Serbe, e cila kishte bojkotuar institucionet kosovare që nga viti 2022.
Komisioni Qendror i Zgjedhjeve i Kosovës ende nuk ka të dhëna për pjesëmarrjen e grave në këto zgjedhje, ndërsa Bayr tha se raporti i PACE do të flasë për këtë më hollësisht pasi të publikohet në një datë më vonë.
Sipas ligjit në Kosovë, 30 për qind e listës zgjedhore duhet të jetë me kandidate gra për deputete.
Rrjeti i organizatave joqeveritare, Demokracia në Veprim (DnV), i cili e ka vëzhguar fushatën zgjedhore dhe votimin, tha së pjesëmarrja e grave në fushatë ka qenë mjaftë e ulët.
DnV kishte raportuar edhe për gjuhë të urrejtjes ndaj grave në komente në rrjetet sociale.
Ndërkohë, shefja e PACE përmendi edhe disa nga parregullsitë që janë raportuar gjatë ditës së zgjedhjeve, si mospërditësimi i listave të votuesve, dyshimet për fshirjen e lehtë të ngjyrës matrikuluese etj.
Raporti i PACE për zgjedhjet në Kosovë do të diskutohet në seancën e prillit në Asamblenë Parlamentare të Këshillit të Evropës, tha Bayr.
Rreth 40.59 për qind e mbi 1.9 milion votuesve me të drejtë vote në Kosovë votuan në zgjedhjet e 9 shkurtit. Paraprakisht, për këto zgjedhje kanë votuar edhe diaspora, përmes postës, por edhe fizikisht në disa përfaqësi diplomatike të Kosovës në botë.
Lëvizja Vetëvendosje e Albin Kurtit po prin me 41.01 për qind apo 322.376 vota të fituara në zgjedhjet parlamentare të 9 shkurtit.
Ky rezultat preliminar i publikuar nga Komisioni Qendror i Zgjedhjeve bazohet në numërimin e 93.25 për qind të vendvotimeve.
Në këtë numërim nuk përfshihen votat me kusht, të personave me nevoja të veçanta dhe votat nga jashtë vendi, të cilat do të numërohen më vonë.
