“Misioni i LSI-së ka mbaruar bashkë me lojën ‘i treti i vërteti’”. Kjo mësohet të ketë qenë porosia e qartë që kreu i PS-së Edi Rama iu ka bërë drejtuesve të qarqeve. Në fakt edhe nëse Rama nuk e thotë këtë publikisht prej ditësh ai ka nisur sulmin frontal ndaj LSi-së.
Pa i ndërprerë ata nga fushata, ai ka komunikuar deri pas mesnate me koordinatorët në qarqe përmes një video-konference, ku ka marrë të dhëna prej tyre për ecurinë e fushatës, por edhe votat që PS-ja parashikon të marrë në çdo bashki, shkruan “Panorama”.
Rama se u ka thënë atyre se nuk është problem i socialistëve nëse Ilir Meta apo krerët e tjerë të partive të vogla e marrin këtë si luftë politike, apo personale ndaj tyre, dhe sipas tij socialistët nuk duhet të bien në batakun e fushatës së tyre të mbushur me mllef e kërcënime, pasi misioni i LSI-së ka mbaruar bashkë me lojën “i treti i vërteti”.
Drejtuesit politikë në qarqe kanë kërkuar shpjegime mbi deklaratën e bërë në komunikimin javor dhe mësohet se Rama e ka nënvizuar edhe më fort këtë tezë, duke argumentuar se nënshtrimi i mëtejshëm ndaj logjikës së copëtimit të administratës me LSI-në apo të tjerë, në dëm të projektit të shtetbërjes, për hir të numrave në parlament, është i papranueshëm për të.
Duke marrë edhe opinionet që vijnë nga çdo qark, nga kontaktet që kandidatët marrin me qytetarët, në komunikimin e së dielës në mbrëmje është thënë si nga Rama, ashtu dhe nga krerët e qarqeve se koalicioni me LSI-në është tanimë kapitull i mbyllur dhe disa prej tyre kanë kërkuar që kjo të thuhet hapur.
Gjatë bashkëbisedimit me bashkëpunëtorët e tij në krye të listave të kandidatëve, kryesocialisti ka ballafaquar të dhënat e sondazheve që PS-ja zhvillon çdo javë dhe raportimeve që jepnin drejtuesit politikë në çdo qark.
Mesa duket në këto dy javët e fundit që na ndajnë nga zgjedhjet na presin deklarata edhe më të forta mes aletaëve qeverisës në katër vitet e fundit. (E.K/SHUPLAKA)
