Mister zhdukja e 49-vjeçarit Naim Likometi në Ksamil, rrobat dhe telefoni u gjetën në breg të detit

Një ngjarje e rëndë ka ndodhur në Ksamil, ku një 49-vjeçar nga Tirana, Naim Likometi, është shpallur i zhdukur që prej mëngjesit të 8 marsit 2025.

Sipas burimeve, 49 vjeçari Naim Likometi, i cili zotëron një banesë në Ksamil, por që është rezident në Tiranë, është larguar nga shtëpia e tij rreth orës 06:00 të mëngjesit të 8 marsit dhe që nga ai moment nuk ka pasur më asnjë kontakt me familjarët apo miqtë e tij.

Sipas burimeve familjare në momentin kur është larguar nga banesa ishte i veshur me një xhup të zi, atlete Adidas dhe një kostum sportiv Adidas me ngjyrë blu të errët. Pas zhdukjes, policia e Sarandës ka nisur kërkimin e tij.

Ajo që ka shtuar edhe më shumë dyshimet është se sot në mesditë, policia e rendit ka gjetur në breg të detit në Ksamil një palë rroba dhe një telefon celular, që sipas familjarëve, i përkasin 49-vjeçarit.

Sipas burimeve nga familja Likometa telefoni celular i 49 vjeçarit ka qenë aktiv deri në orën 16:00 të datës 8 mars, por pas kësaj ore ka rezultuar i fikur.

Autoritetet policore të rendit dhe ato kufitare të Sarandës dhe familjarët e tij kanë nisur kërkimet për të gjetur 49-vjeçarin. Kërkimet bëhen në tokë dhe në det, pasi lind dyshimi se edhe mund të jetë mbytur.