Pas ministrit të Punëve të Jashtme Ditmir Bushati, përfaqësuesja e Lartë e bashkimit Europian për Politikën e Jashtme dhe Sigurinë, Federica Mogherini është takuar edhe me kreun e Kuvendit Ilir Meta.
Sipas raportimeve, temë kryesore e takimit ka qenë reforma në drejtësi dhe integrimi i Shqipërisë në BE.
Në këtë takim, Meta shprehu mirënjohjen për mbështetjen e vazhdueshme të Bashkimit Evropian në avancimin e Shqipërisë drejt hapjes së bisedimeve për anëtarësim dhe në veçanti për asistencën e dhënë në kuadër të reformave kyçe.
“Një reformë e bazuar në Kushtetutë e rrit besueshmërinë e procesit dhe e përshpejton zbatimin më cilësor të saj” me qëllim që Shqipëria të ketë mundësi ta luftojë më mirë korrupsionin, krimin e organizuar, trafiqet e paligjshme dhe për të krijuar një klime më të favorshme për investimet e huaja.”, tha Meta.
Meta dhe Mogherini diskutuan gjithashtu edhe mbi zhvillimet e fundit në rajon, duke ndarë bindjen e përbashkët se një Shqipëri e stabilizuar dhe konstruktive i shërben më mirë stabilitetit dhe bashkëpunimit rajonal. (D.D/Shuplaka)
