Fax Neës ka siguruar momentet të fundit të Jan Prengës, përpara se të rrëmbehej dhe më pas vritej nga të paktën 7 persona, disa prej të cilëve janë vënë në pranga nga ana e policisë.
Mësohet se Prenga është vëzhguar disa ditë nga ana e rrëmbyesve, të cilët janë kujdesur që të evidentojnë të gjitha lëvizjet e tij, në mënyrë që të mos dështonin në momentin final.
Po ashtu për herë të parë është zbuluar dhe imazhi i Gentian Doçit, i cili konsiderohet nga policia shqiptare si koka e organizatës kriminale, e cila realizoi pengmarrjen dhe më pas vrasjen e Jan Prengës në Kamëz në datën 17 janar të këtij viti.
I konsideruar si një eksponent i krimit të organizuar dhe në kërkim ndërkombëtar, pamjen dhe indentitetin e Gentian Doçit e njohin pak persona.
“Ai dyshohet të ketë ndryshuar së paku pesë mbiemra dhe së fundmi ka marrë mbiemrin Funoqi, që mendohet se është mbiemri i vajzërisë së mamasë së tij”, tha një ekspert i hetimit të krimit të organizuar.
“Besohet se Gentjan Doçi vazhdon të fshihet në Shqipëri, diku në zonën e Dukagjinit dhe mendohet që ai ka lidhje edhe me njerëz të policisë. Por kjo mbetet për t’u konfirmuar”, ka deklaruar një burim nga grupi hetimor për mediat.
Dyshimet hidhen pas të dhënave operative që tregojnë se 38-vjeçari vazhdonte të jetonte i qetë në supervilën e tij në lagjen “Skënderbeg” të Shkodrës, edhe pse “kokën” e tij e kërkonte edhe Italia.
Gentian Doçi mendohet të jetë një nga drejtuesit e një rrjeti trafiku droge, që ka influencë në vendet e Evropës. I quajtur si Grupi i Dukagjinit, emri i këtij rrjeti doli në skenë pas rrëmbimit të Jan Prengës.
