Pamje të reja janë publikuar në mediat ndërkombëtare lidhur me sulmin e rëndë shënuar një ditë më parë në qytetin gjerman të Düsseldorf-it, ku raportohet se kanë mbetur të plagosur 7 persona.
Mediat gjermane bënë me dije që në fillim se një person ka qëlluar me sëpatë disa persona në një stacion treni. Menjëherë, forcat antiterror kanë rrethuar stacionin e trenit.
Agresori është identifikuar si një 36-vjeçar me origjinë nga ish-Jugosllavia, që banon në Wuppertal. Dyshohet se ai ka pasur probleme mendore. Edhe i dyshuari flitet se ka mbetur i plagosur gjithashtu. Një zëdhënës i policisë federale njoftoi fillimisht se dy persona u vunë në pranga, por më vonë informacioni u korrigjua duke bërë me dije se bëhej fjalë vetëm për një arrestim.
Policia u shpreh se deri tani nuk ka asnjë tregues se sulmi ka qenë me motive terroriste. (XH.A/SHUPLAKA)
