Paraditen e sotme, “Shuplaka” bëri me dije se një ndër të dënuarat në Tiranë që përfitonin nga amnistia ishte edhe Uarda Çota, autorja e aksidentit me pasojë vdekjen e 11-vjeçarit Rubin Peka, djali i ish-zv/ministrit Avenir Peka.
Kujtojmë se aksidenti u shënua rreth dy vite më parë dhe Uarda Çota u dënua me 5 vite burg në ndryshimin me masën e dënimit të kërkuar nga Prokuroria prej 8 vitesh burg. Ajo u lirua ditën e sotme si një ndër 10 gratë e dënuara që vuanin dënimet në burgjet e Tiranës.
“Falenderime të përzemërta zotit Ministër. Ishte ai iniciatori. I uroj lirim sa më të shpejtë të gjithë atyre personave që janë gjendur në të njëjtën situatë si unë në të gjithë këto kohë.”, është shprehur Uarda Çota për “Channel One”.
Por, Çota nuk shfaqi asnjë shenjë pendese për ngjarjen tragjike, ku për faj të saj humbi jetën një fëmijë.
Në videon e mëposhtme shihet momenti kur Uarda Çota është takuar me të afërmit e saj, të cilët e prisnin jashtë dyerve të burgut. Momenti i takimit me të afërmit është përshkuar nga lot malli, përqafime dhe buqeta me lule. I pranishëm në momentin e daljes së saj nga burgu duket edhe ministri i Drejtësisë, Ylli Manjani. (XH.A/SHUPLAKA)
