Monika Kryemadhi sot në emisionin “Kjo javë” të gazetares Nisida Tufa, ka folur për mjaft pikëpyetje dhe çështje të aktualitetit politik.
E pyetur nëse LSI ka një emër për presidentin dhe nëse ka marrëveshje me PS-në për këtë post, Kryemadhi tha se nuk ka dijeni por se çdo parti mund të ketë emra për presidentin. Ndërsa pyetjes nëse e sheh veten si Presidente, Kryemadhi është përgjigjur ‘jo’.
Flitet për një marrëveshje ‘underground’ PS-LSI për Presidentin, a keni dëgjuar?
Nuk kam dëgjuar fare.
A ka LSI një emër për Presidentin?
Sigurisht një emër e kanë të gjitha partitë.
Ju e shihni veten si presidente?
Unë? Jo, absolutisht. Nuk është pozicioni im, nuk ka të bëjë me mua.
Kryemadhi tha se nuk do të donte të kandidonte për deputete në zgjedhjet e 18 qershorit, por në të vërtetë do ta bëjë një gjë të tillë.
Kryemadhi, e cila ditët e fundit ka qenë në qendër të diskutimeve për shkak të kritikave të saj ndaj qeverisë, nuk ka dhënë një përgjigje të qartë nëse LSI do të ripërsëris koalicionin me PS-në. Ajo deklaroi se LSI vazhdon të jetë në koalicion, megjithëse vetë nuk ka qenë pjesë e marrëveshjes.
Duke iu përgjigjur deklaratave të bëra sot nga deputeti socialist Taulant Balla, Kryemadhi tha se nuk po bën opozitën dhe se të kesh një mendim ndryshe nuk është opozitë. “Nuk është keq t’i thuash gjërat siç janë. Mënyra e të bërit politikë ndonjëherë na ka lënë mbrapa. Sa më shumë të fokusohemi tek problematikat, aq më shumë i largohemi demagogjisë”, tha Kryemadhi.
(M.D/ Shuplaka)
