Një ditë para zgjedhjeve të padekretuara nga Presidenti, Ilir Meta ka një mesazh qetësie për të gjithë shqiptarët, duke iu thënë se pas të dielës vjen e hëna, dhe nënkuptuar se përplasja institucionale në vendin tonë do të vijojë. Meta thotë se pavarësisht ndasive politike, e hëna do të na gjejë sërish bashkë si shqiptarë, pse jo duke pirë kafe dhe me miqtë dhe fqinjët tanë.
Postimi i Presidentit:
Të dashur miq!
Kënaqësi t’ju uroj nga lagjja ku banoj një fundjavë sa më të qetë për të gjithë ju, dhe sa më pranë familjeve tuaja e njerëzve të dashur të zemrës.
Po kështu sa më larg zhurmës, tensioneve dhe streseve. Të mos harrojmë se nuk ka vetëm të dielë, por edhe të hënë. Dhe përsëri kafen e mëngjesit do e pimë me njëri-tjetrin, me fqinjët tanë dhe miqtë tanë, pavarësisht nga idetë e ndryshme politike.
Kujtojmë se e shtuna e sotme është dita e heshtjes zgjedhore, ndërsa nesër vendi do të shkojë drejt zgjedhjeve njëpartiake, për herë të parë pas 30 viteve demokraci. Presidenti Meta ka dekretuar një datë të re për zgjedhjet lokale, që është ajo e 13 Tetorit.
(E.K/Faxweb.al)
Discussion about this post