Loja “Balena Blu” u ka futur tmerrin të gjithë prindërve në mbarë botën, pasi shumë të rinj kanë vrarë veten vetëm me qëllimin për ta fituar këtë lojë.
Mirëpo ndërsa mendohej se në Shqipëri kjo lojë nuk ishte e përhapur, gjatë këtyre ditëve, rrëfime të ndryshme të adoleshentëve shqiptarë kanë vërtetuar të kundërtën.
Një rast ka ndodhur në Fier, ku një 14-vjeçare ka rënë viktimë e kësaj loje dhe rastin e ka treguar shoqja e ngushtë në një mesazh për “JOQ”.
Ndërkohë një tjetër 14-vjeçare tregonte për gazetën “Panorama” se si ishte bërë pjesë e lojës. Kronika të shumta televizive me fëmijë që rrëfehen për veten apo shokët e tyre, se si ata kanë shpuar duart me thikë apo mjete të mprehta, kanë tronditur mbarë publikun shqiptar.
Së fundmi, gazetari i njohur Muhamed Veliu ka publikuar një fotografi në Facebook, në të cilën shikohet një tabelë ku shkruhet: Lajmëërim , mos shkarkoni lojën “Balena Blu”. Loja djallëzore. Shumë veta kanë vdekur, 142 fëmijë.
Veliu tregon se tabelën e ka parë në hyrjen e një pallati. Kjo tregon qartazi panikun që është shkaktuar ndër qytetarë, të cilët po mundohen të ndërgjegjësojnë të rinjtë të mos e shkarkojnë lojën e cila vetëm në Rusi ka vrarë mbi 140 fëmijë. (D.D/Shuplaka)
Discussion about this post