Tërmeti i mëngjesit të së martës që tronditi Shqipërinë ka futur shumë njerëz në panik. Për të treguar sesi duhet të përballohet dhe menaxhohet situata pas lëkundhjkeve të forta të tokës, foli për mikrofonin e Fax News sociologu Gëzim Tushi. Si fillim, ai sqaroi se të gjithë njerëzit kanë nevojë për mbështetje psiko-emocionale me qëllim tejkalimin e kësaj situate.
Sipas tij, është normale që njerëzit në panik të lënë shtëpitë e tyre pas lëkundjeve të tërmetit, por shtoi se një gjë e tillë krijon edhe kaos.
“Na duhet një mbështetje psiko-emocionale e personave që janë prekur nga tërmeti dhe më pas ajo materiale nga ana e qeverisë për të rregulluar dëmet. Një situatë e tillë nuk parashikohet dhe prania e panikut është e natyrshne. Ka njerëz që janë traumatizuar, është e vështirë t’i kontrollojnë situatat në familje dhe largimi i tyre nga familja nuk më duket një arsye për t’i anatemuar.
Largimi në panik siç po ndodh tani, që po ikin si ata që i kanë shtëpitë e shkatërruara, edhe ata që s’i kanë, duhet thënë që paniku krijon situata kaotike dhe shikoj këto vargjet e makinave që disa po ikin në Kosovë, disa po ikin në jug. Kam përshtypjen që duhet progresuar me rregull. Erdhi moment që ne të krijojmë një kulturë tjetër. Duhet ta përballojmë me dinjitet situatën që mund të na vijë”, tha sociologu për Faxnews.
Ai shpjegoi edhe sesi duhet të sillen prindërit me fëmijët në rastet e tërmeteve. Sipas tij, është shumë e rëndëishme që prindërit të shfaqen të qetë para të vegjëlve të tyre dhe t’ua shpjegojnë me qetësi që e gjitha kjo është një fenomen natyror që nuk e kanë njerëzit në dorë.
“Unë mendoj që një pjesë e fëmijëve janë ata që e kanë përjetuar për herë të parë tërmetin dhe kjo është një ngjarje që le gjurmë shumtë të thella tek fëmijët. Duhet shpjeguar shumë kujdesshëm që nuk varet nga ne. Duhet t’ua shpjegojmë si një fenomen natyror që ndodh.
Nëse ne jemi në një gjendje alarmante, nëse ne shfaqim një krizë, atëherë edhe gjurmët që lemë tek fëmijët është shumë e thellë. Ka shumë mënyra për t’ua shpëejguar, në mënyrë artistike, në mënyrë metaforike”, u shpreh Gëzim Tushi.
Përveç këshillave sesi duhet ta përballojmë situatën post-tërmet, Tushi komentoi edhe menaxhimin e deritanishëm të pasojave që shkaktuan lëkundjet e tokës si edhe qëndrimin e politikës deri tani. Për sociologun, është shumë mirë që palët politike të jenë bashkë në raste të tilla. Nga ana tjetër, ai kërkoi që institucionet të jenë më serioze në këto raste.
“Unë nuk mendoj se nuk ka përpjekje serioze për ta menaxhuar situatën, por kjo që na ndodhi do të thotë që duhet ta mendojmë ndryshe menaxhimin e një situate të ngjashme. Institucionet duhet të jenë më serioze dhe strukturat e emergjencës më eficente. Më ka ardhur mirë që shoqëria shqiptare, edhe pse me problemet e saja, është treguar solidare.
Më ka ardhur mirë edhe që politika është më e bashkuar në këto ditë. Më ka ardhur shumë që të dyja palët janë treguar më mbështetëse të njëra-tjetrës duke vlerësuar që ky fenomen nuk na ndan në të majtë dhe në të djathtë”, deklaroi Gëzim Tushi për Fax News.
(M.I/ Faxweb.al)
