Zëdhënësja e Ministrisë së Jashtme ruse, Maria Zakharova, ka konfirmuar për agjencitë ruse të lajmeve se ambasadori rus në Ankara, Andrey Karlov ka ndërruar jetë pas një sulmi me armë.
Zakharova tha se, ambasadori vdiq pas një akti terrorist dhe se Moska është në kontakt me autoritetet turke për të marrë informacione rreth sulmit.
“Sot, gjatë një ngjarje publike, një person i panjohur ka hapur zjarr kaotik”, ka thënë ndër të tjera zëdhënësja e ministrisë së jashtme ruse.
Ndërsa zëdhënësi i Kremlinit, Dmitry Peskov i tha agjencisë së lajmeve “Interfax” se, presidenti Vladimir Putin ishte në dijeni në lidhje me sulmin dhe se së shpejti do të publikojnë një raport nga shërbimet e inteligjencës në lidhje me këtë ngjarje.
Ambasadori rus u qëllua me armë zjarri teksa po fliste në një ekspozitë të artit pamor në Ankara. Ai u qëllua nga pas shpine nga 22-vjeçari Mert Altintas. Diplomati ndërroi jetë në spitalin e Ankarasë. (A.R/SHUPLAKA)
