I gjithë vendi është përfshirë nga një mot i keq, ku temperaturat kanë pësuar rënie të ndjeshme, ndërsa prezente janë erërat e forta dhe reshjet e shumta të dëborës. Që pasditen e djeshme, në Kukës, Ersekë, Korçë, Llogara nisën reshjet dendura të borës, ndërsa pati bllokime rrugësh vetëm në disa zona të thella.
Autoriteti Rrugor Shqiptar ka bërë me dije gjendjen e akseve kryesore në vend. Në një njoftim për mediat, ARRSH ka njoftuar se deri tani nuk ka asnjë aks rrugor të bllokuar nga bora, ndërsa aty ku ka patur reshje dhe ngrica, po punohet me kriposjen.
Njoftimi i plotë i ARRSH:
Rajoni Verior: Gjatë natës problem kanë qenë temperaturat e ulëta dhe era e fortë. Në segmentin “Kuben-Vasije” ka pasur reshje bore 4-5 cm, shoqëruar me erë të fortë në formë cikloni. Qarkullimi realizohet normalisht dhe pa zinxhirë në të gjitha akset e e rajonit verior.
Rajoni Qendror: Në të gjitha akset e Rajonit Qendror qarkullimi kryhet normalisht. Vazhdon puna për spërkatjen me kripë në vendet ku ka akull e ngrica.
Rajoni Jugor: Në akset rrugore të Rajonit Jugor qarkullimi kryhet normalisht. Nuk ka pasur reshje gjatë natës. Temperatura deri në -7 ° në disa zona, si: Dardha dhe Qafa e Qarrit ku ka pasur dhe erë të fortë.
Është punuar me kriposjen e akseve. Të gjithë kontraktorët janë në gatishmëri për përballimin e çdo situate. Vijon puna për pastrimin e akseve dhe kriposjen në vendet ku ka ngrica dhe akull nga temperaturat e ulëta.
(M. I./ Faxweb.al)
