Manchester United, edhe pse për pak kohë, ka qenë rivali i vetëm i Juventus në garën për të marrë Cristiano Ronaldo-n. Pasi ka vendosur t’i thotë lamtumirë Real Madrid-it, ylli portugez ka qenë i tunduar nga ideja për të veshur përsëri fanellën e “Djajve të Kuq”, por në fund ka mbizotëruar dëshira për t’u vënë në provë në kampionatin italian.
Ku i dihet nëse në zgjedhjen e tij ka ndikuar edhe fakti se Jose Mourinho është trajneri i Manchester United. Bashkëjetesa me të në Madrid nuk ka qenë aspak e lehtë.
Ish-trajneri i Inter e ka “bekuar” transferimin e CR7 në Serinë A, por ka vendosur t’i dërgojë një paralajmërim Juventus-it nga Amerika, aty ku skuadra e tij po merr pjesë në International Champions Cup.
“Juventus dominon prej vitesh dhe do të vazhdojë ta bëjë falë blerjes së Ronaldo-s, por nga ana tjetër mendoj se ky operacion do të motivojë akoma më shumë ekipet e tjera të mëdha të kampionatit, që do të kërkojnë të bëjnë më mirë se Juventus: Inter, Milan, Napoli dhe Roma do të jenë akoma më të vendosura. E gjitha kjo mund ta bëjë kampionatin italian më emocionues dhe cilësor”, ka thënë portugezi.
