Trajneri i Mançester Junajtidit, Zhoze Murinjo, e ka treguar qartazi se ndeshja e fundit e Premier Ligës nuk i intereson aspak, pasi vëmendja e tij është totalisht në përgatitjen e finales së Ligës së Europës përballë Ajaksit.
Gjatë stërvitjes së sotme për përballjen me Kristal Palasin, Murinjo është shtrirë në stol për t’u qetësuar, duke u shfaqur i painteresuar për gjendjen e skuadrës në prag të takimit përmbyllës të këtij sezoni në kampionatin anglez.
Ndërkohë në një intervistë për mediat, portugezi sulmoi formatin e kompeticioneve europiane që i jep të drejtë skuadrave nga Liga e Kampioneve të luajnë edhe në Ligën e Europës.
“Ajaksi nuk duhet të ishte në finalen e Ligës së Europës. Ata janë një ekip i Ligës së Kampioneve dhe vijnë që prej andej, gjithnjë kam qënë kundër këtij lloji formati. Një ekip nuk duhet të ketë të drejtë të luajë në dy kompeticione europiane brenda një sezoni. Ata që eliminohen nga Liga e Kampioneve duhet të shkojnë në shtëpi. Liga e Europës është për ekipe si ne që e kanë filluar këtë garë që nga fillimi dhe kanë luftuar për të arritur deri këtu”, u shpreh Murinjo.
Discussion about this post