“M’u përmbys dynjaja, por mësova të eci në rrugën time”, historia e 9 vjeçares nga Skroska e Librazhdit

“M’u përmbys dynjaja! Nuk e besoja dot! Mendoja, mos po gabohen këta? Mos m’i kanë ngatërruar analizat e gocës?”. Kështu ka rrëfyer nëna e Alesias, zonja Zhaneta. 

Ajo bashkë me vajzën dhe familjen e saj jetojnë në Skroskë të Librazhdit por jeta për to nuk ka qenë e lehtë. 

9-vjeçarja, Alesia lindi me paralizë cerebrale por kjo nuk e ka penguar të jetë e para e klasës, apo të shkëlqejë në orën e matematikës. Por ajo has edhe probleme.  E ëma,  Zhaneta, e merr çdo mëngjes në shpinë dhe bashkë përshkrojnë rrugën e gjatë prej 40 minutash deri në shkollë pasi ajo nuk mund të eci. 

Një vështirësi që Alesia has çdo ditë është që kur bie zilja, të gjithë vrapojnë të dalin jashtë, marrin diçka për të ngrënë e rrinë në oborr deri sa të fillojë mësimi por ajo nuk mundet.

 Por miqtë e klasës e ndihmojë, ata vrapojnë sërish për t’i blerë diçka. “Kur mbaron mësimi, ata vrapojnë për të shkuar në shtëpi. Unë rri ulur dhe pres mamin.”- tregon ajo.

E ëma nuk vonon kurrë. Sapo mbaron mësimi ajo e e mer në krahë e mbështetur tek njëra-tjetra të kthehen për në shtëpi. 

Aleksia kur u diagnostikua me këtë sëmundje ishte vetëm 3 muajshe “Kur të rritem, dua të bëhem mësuese matematike. Unë mësova të eci në rrugën time”, tregon ajo dhe vrapon të marrë fletoren e detyrave ku ka vetëm “Shkëqyeshëm”.

E gjithë dita dhe nata e Zhanetës janë në funksion të së bijës. Ajo fle pasi Alesia ka rënë në shtrat dhe zgjohet para se vogëlushja e saj të hapë sytë. Për Zhanetën, mirëqenia e Alesias është mbi gjithçka.

Por duke qenë se vuan nga një sëmundje e tillë vogëlushes i nevojiten terapi fizioterapie të vazhdueshme sepse ajo ka dhembje të vazhdueshme fizike.

Në Librazhd ndodhet vetëm një qendër por edhe për këtu Alesia e ka të pamundur të shkojë. 

“I marrim çdo muaj 3000 mijë lekë ilaçe. Mos të llogarisim pastaj pelenat që i duhen. Janë shumë lekë. Për kokë të fëmijëve nuk ia dalim dot. Vetëm trasporti kushton 400 lekë. Rruga ku kalon furgoni, është kaq e keqe sa kur kthehemi nga terapia goca ankohet për dhimbje trupi”, tregon Zhaneta.

Sipas “World Vision” e cila ka filluar programin social “Tungjatjeta”, çdokush mund të dhuroj para sadopak çqë  Alesia të  mund të shkojë në shkollë me karrocë të re si dhe të marrë shërbimet bazë që i duhen. (J.V/Shuplaka)