Është muaji i shenjtë i Ramazanit po kjo nuk e pengon shtetin islamik të ISIS-it që të bëjë thirrje për akte dhune në Europë dhe SHBA.
Në një audiomesazh që po qarkullon në botë dhe mendohet se ka ardhur nga një zëdhënës i Shtetit Islamik u bëhet thirrje ndjekësve të këtij shteti që të bëjnë sulme në SHBA, Evropë, Rusi, Australi, Irak, Siri, Iran dhe në Filipine gjatë muajit të shenjtë të Ramazanit, që ka nisur në fund të muajit maj.
Audio mesazhi është shpërndarë të hënën në kanalin e Shtetit Islamik në “Telegram”, një aplikacion për shpërndarjen e mesazheve. Ndërsa i atribuohej zëdhënësit zyrtar të grupit militant, Abi al-Hassan al-Muhajer, raporton Reuters.
Vërtetësia e incizimit nuk është verifikuar në mënyrë të pavarur, por zëri është i njëjti me porosinë e kaluar që pretendohej të jetë nga zëdhënësi.
“O luanë të Mosulit, Raqqas dhe Tal Afarit, Zoti i bekoftë ata krahë të pastër e fytyra të shndritura, angazhohuni kundër refuzuesve dhe femohuesve dhe luftoni ata me fuqinë e një njeriu”, ka thënë al-Muhajer. Termi refuzues është një term nënçmues që përdoret për t’iu referuar myslimanëve shiitë.
“Për vëllezërit e fesë dhe besimit në Evropë, Amerikë, Rusi, Australi dhe në vende tjera. Vëllezërit tuaj në tokat tuaja kanë bërë punë të mirë prandaj merrini ata si model dhe veproni siç kanë vepruar ata”, thuhet në audio mesazh. (E.K/SHUPLAKA)
