Ministria e Mbrojtjes u ka bërë një thirrje të gjithë qytetarëve që të bëjnë kujdes dhe të shmangin ndërtesat e larta e pemët për shkak të motit të keq.
Përmes një postimi në “Facebook”, Ministria e Mbrojtjes ka kërkuar nga qytetarët që të mos qëndrojnë pranë sendeve që bien sepse mund të shkaktohen aksidente. Deri tani, sipas MM, nuk ka njerëz të lënduar, por vetëm dëme materiale.
“Ministria e Mbrojtjes, përmes Agjencisë Kombëtare të Mbrojtjes Civile, nisur nga situata e pazakontë e erës së fortë gjatë orëve të fundit në disa qarqe të vendit, i bën thirrje qytetarëve, të shmangin qëndrimet në afërsi të pallateve, godinave të larta, pemëve dhe objekteve të rrezikshme.
Rënia e sendeve dhe objekteve të ndryshme për shkak të erës përherë e më të fortë, mund të bëhen shkak për aksidente. Ndërkohë, Ministrja Xhacka përmes AKMC është në komunikim të vazhdueshëm me shtabet e emergjencave në të gjitha prefekturat, për të ndjekur orë pas orë situatën e vështirë të motit të shkaktuar nga erërat dhe bora në disa qarqe.
Sipas informacioneve paraprake të deritanishme situata është nën kontroll dhe nuk raportohen probleme”, ka njoftuar Ministria e Mbrojtjes.
(M. I./ Faxweb.al)
