Kryetari i Unionit të Gazetarëve Shqiptarë, Aleksandër Çipa komentoi paketën anti-shpifje të propozuar nga qeveria, i cili po diskutohet në komisione, por ka ngjallur shumë debat.
Në studion e “FaxNews”, Çipa deklaroi se gazetarët janë bërë gjithë bashkë dhe e refuzojnë këtë draft. Sipas tij, ekziston rreziku që drafti të përdoret si alibi për të ushtruar censurë ndaj mediave.
“Pozicioni jonë është i bashkëshoqëruar në unifikim me pozicion e gjithë organizatave të tjera të gazetarëve. Kurrë më parë nuk ka patur një unfikim të tillë me organizatat kombëtare dhe atyre ndërkombëtare. Ne shohim që përditshmërisht po na bashkohen edhe qëndrime editorial nga mediat më prestigjioze në botë. Qëndrimi jonë është thjesht një refuzim logjik dhe i argumentuar për mënyrën metodologjike si u formulua ky draft.
Deri në çastin kur Komisioni i Mediave ka paraqitur këtë draft, ka patur edhe 2-3 versione të tjera që janë diskutuar në mënyrë parciale me grupe të ndryshme të interesit, por jo me grupin më themleor, që janë grupi i gazetarëve. Ky është drafti zyrtar për të cilin janë thirrur në konsulencë nga dy komisionet respektive dhe kemi patur komunikim për reçensën juridike që mund të përdoret si një lloj alibie e diktaturës”, tha ai.
Sipas tij, në draft shkelet e drejta e mediave që gjobiten që të prezumojnë pafajësinë e tyre në gjykatë.
“Ne jemi kundër mënyrës sesi konceptohet të funksioniojnë AMA dhe AKEP. Mënyra sesi është koncpetuar, ndërlidhja mes tyre, mbart në vetvete paradoksin e konfliktit të interesit. Ashtu sikur kur vjen puna për mbrojtjen e operatorit për të mos u kryer ndëshkimi pa dalë vendimi i gjykatës. Kjo është e mbrapshtë dhe kjo është një shkelje e të drejtës për prezumimin e pafajsisë”, shtoi Çipa gjatë intervistës.
Gazetari zbuloi edhe se të ardhurat e mediave online që mund të gjobiten nuk i përballojnë dot gjobat që ka parashikuar qeveria. “Ne na rezulton se masa e penaliteteve financiare është e papërballueshme për të ardhurat e portaleve”, deklaroi Aleksandër Çipa.
Discussion about this post