Kryeministri i Kosovës, Isa Mustafa, ka bërë me dije se muri që po ndërtohet mbi lumin Iber të Kosovës do të hiqet. Sipas kreut të qeverisë kosovare, muri është jashtë marrëveshjes së Brukselit.
Këtë deklaratë, ai e bëri gjatë një vizite që zhvilloi në komunën e Gjilanit. Megjithatë, ai nuk bëri të ditur se në ç’datë do të veprohet për heqjen e tij.
Të njëjtin qëndrim ka mbajtur së fundmi edhe kryetari i Kuvendit të Kosovës, Kadri Veseli, i cili u shpreh se çdo tentativë për të ndërtuar mure në këtë shekull është kundër vlerave europiane.
“Ky mur nuk do të ekzistojë e as nuk do ta lejojmë, për këtë qytetarët duhet të jenë të sigurt, sidomos ata në Mitrovicës. Ndërtimi i mureve është një kompleks rus që po tenton të shfaqet negativisht në Kosovë. Ne për këtë sot kemi biseduar edhe më BE-në dhe këtë mur nuk do ta lejojmë”, është shprehur Veseli.
