Prokuroria e Krimeve të Rënda i ka dërguar një letër porosi të re Greqisë për Klement Balilin, i shpallur në kërkim ndërkombëtar për trafik droge.
Organi i akuzës shqiptare i ka kërkuar autoriteteve greke informacione shtesë për të cilësuarin nga mediat helene si ‘Eskobari i Ballkanit’.
Ndërkohë që Balili është ende në kërkim dhe vendodhja e tij nuk dihet, duket se autoriteve shqiptare nuk i mjaftojnë provat për lidhjen e tij me krimin.
Mes kërkesave të prokurorisë është që autoriteteve shqiptare t’i vihen në dispozicion përgjimet dhe aktet e ekspertimit. Sakaq, në Greqi janë arrestuar 10 persona, të cilët dyshohet si bashkëpunëtor të Balilit në rrjetin e trafikut.
Ndërkohë, Interpoli grek i transmetoi më herët Shqipërisë vendimin e formës së prerë për shpalljen në kërkim të Klement Balilit, dhe i kërkoi për herë të dytë Policisë shqiptare kapjen e të kërkuarit
Në datën 30 janar 2017, Interpol Athina i ka përcjellë Interpol Tiranës dokumentin e vendimit penal të Gjykatës së Apelit në Greqi, e cila ka lënë në fuqi urdhërarrestin ndërkombëtar për biznesmenin nga Shqipëria për akuzën e trafikut të drogës.
