Një ngjarje e rëndë ka ndodhur pasditen e djeshme në ambientet e një godinë shtetërore në QS, ku për momentin janë duke zhvilluar mësimin studentët e Fakultetit Ekonimik, pasi godina e Universitetit të tyre është në rikonstruksion e sipër.
Dy persona të paidentifikuar kanë hyrë gjatë një ore leksioni, me pedagogen Ermelinda Mulaj, “Drejtim Financiar”, dhe kanë ngacmuar pjesën më të madhe të studentëve, të vitit të tretë.
Fillimisht ngjarja ka nisur si një ngacmim në drejtim të vajzave studente, dhe më pas ka degjeneruar në dhunë fizike në ambientet e jashtme të godinës ku zhvillohen leksionet, pranë sheshit Demokracia.
Në një lidhje telefonike me Fax News, një nga studentet që ka qenë dhe dëshmitare e sherrit, shprehet e frikësuar për sigurinë e saj, dhe të të gjithë grupit.
“Kemi qenë duke zhvilluar një orë mësimi normale, dhe dy persona kanë hyrë në mësim me pretekstin se ishin të sjellë nga dekani. Kur kemi dalë jashtë jemi terrorizuar, janë turrur në drejtimin tonë, dhe të gjithë kemi mbetur të lënduar. Policia e Shtetit thotë që ka polici private, dhe nuk na e ka marrë denoncimin. Nuk i kemi parë asnjëherë këta persona në ambientet e shkollës”, është shprehur studentja që preferon që të ruajë anonimatin.
Motra e një prej studentëve që ka mbetur i lënduar nga sulmi, duke rrëfyer për redaksinë e Faxweb.al është shprehur se të rinjtë ndihen të terrorizuar, ndërsa ditën e sotme do të ketë një bojkot të orëve të mësimit.
Për ngjarjen nuk ka ende një reagim nga ana e institucioneve, pasi policia e shtetit pretendon se nuk është përgjegjësia e saj siguria e universiteteve, dhe se kjo detyrë i takon policisë private.
I kontaktuar nga Faxnews dekani i Universitetit Ekonomik Dhori Kule nuk ka dhënë asnjë detaj për ngjarjen, duke thënë se nuk ishte në dijeni për këtë, edhe pse personat që kanë dhunuar studentët kishin folur në emrin e tij.
Rrëfimi i motrës së një prej studentëve të lënduar:
Dy studentë të paidentifikuar kanë hyrë në mesim me pretendimin se janë të dërguar nga dekani, pedagogia i ka lejuar të hyjnë në mësim kanë sharë vajzat, pas mësimit dy vetë nga klasa kanë ngritur zërin ndaj sjelljes së tyre, pasi nuk mund ti duronin më kunjat e tyre.
Kur kanë dalë nga mësimi janë përballur me një grup 20 vetash të cilët kanë kaluar direkt në përleshje fizike, e vetmja arsye nuk duan të bëhen publike emrat është se kanë frikë mbi pushtetin e personave që fshihen pas tyre.
Një oficer i policisë gjyqësore është shprehur se Policia e shtetit nuk ka përgjegjësi për ngjarjen, pasi Universitetet ruhen nga polici private.
Vëllai im ka qenë në spital gjatë natës, ka dëmtime në kokë dhe në trup, ka fraktura në hundë dhe në vesh, pritet që ti bëjmë skaner, që të shohim nëse ka probleme të brendshme.
Ska pasur asnjë ndërhyrje nga ana e pedagoges, dhe as nga ndonjë person tjetër nga stafi akademik.
(E.K/Faxweb.al)
Discussion about this post