Ish-ministri i Jashtëm Kastriot Islami ka qenë i ftuar në studion e lajmeve në Fax News, ku ka komentuar krizën politike në vendin tonë, si dhe vizitën e zyrtarit të lartë amerikan Palmer në Shqipëri.
Duke u ndalur te kriza, Islami tha se qëndrimi i palëve është i qartë, me opozitën që sheh si të vetmen mundësi për të ndryshuar gjendjen e vendit, zgjedhjet e parakohshme me një qeveri tranzitore, ndërsa Rama qëndron stoik me idenë për të çuar mandatin deri në fund.
Islami tha se tek shqiptarët është zgjuar shpresa për ndryshim, dhe kjo është treguar dhe me sondazhet e fundit që janë publikuar në media, ku PS ka humbur një përqindje në krahasim me zgjedhjet e fundit.
“Pozicionet e palëve janë të qarta, opozita prej kohësh vë në dukje pikërish arsyen e kësaj krize, që lidhen me korrupsionin e qeverisë, lidhjet e kësaj qeverie me krimin, favorizimin e oligarkisë, për vënien në kontroll të gjyqësorit dhe të medias, për gjendjen e vështirë ku jetojnë sot shqiptarët.
Nga ana tjetër kemi Ramën, që përplasjen e parë e pati me studentët, dhe për të shmangur përballjen me ta, ndërtoi mekanizma për të shmangur vëmendjen nga kjo protestë. Ai shkoi deri në Itali për të thënë se në Shqipëri nuk ka protesta.
Rama është një personazh që e bazon suksesin e tij te fasada, që në kohën kur ka qenë ministër kulture, ndërsa tani po tenton që të ndërtojë dhe një opozitë fasadë. Ka më shumë se tre vite që nuk qeveris, dhe nuk kalon më kohë në zyrën e tij. Që të shkohet në zgjedhje të lira dhe të ndershme opozita kërkon një qeveri pa Edi Ramën.
Ka një sondazh të IPR Marketing, një kompani serioze, në krahasim me 3 vite më parë 80 % e shqiptarëve mendojnë se situata është keq ose më keq. 60% e shqiptarëve duan që të largohen nga vendi, dhe kaq mjafton për të kuptuar situatën e rëndë në të cilën ndodhet sot vendi.
Shqiptarët shprehen se duan që të votojnë për një mazhorancë të re, pra ka një fije besimi për mazhorancën e re që është PD dhe LSI. Opozitës i mbetet shumë punë për të bërë, pasi i duhet një ekip dhe një program shprese”, u shpreh Islami.
Ndërkohë i pyetur nga ana e gazetares Armela Ferko lidhur me vizitën e Palmer në Tiranë, Islami tha se për SHBA-të vëmendje më të madhe në Ballkan ka arritja e një marrëveshje mes Kosovës dhe Serbisë.
Ndërkohë sipas tij Gjermania është pozicionuar qartë kundër kryeministrit Rama, për të cilin tha se në mënyrë të figurshme i është hequr viza në Berlin.
“Nuk dua që të spekuloj lidhur me vizitën e Palmer, është një tur ballkanik, është një person që ka punuar në të dyja administratat, dhe ka pasur disa funksione të ndryshme. Ky është personi që është marrë vazhdimisht me Ballkanin. Me interes më të madh për SHBA-të në Ballkan mbetet marrëveshja mes Serbisë dhe Kosovës.
Mediat pranë Ramës kanë sponsorizuar analistët dhe opinionistët se SHBA-të janë kundër qëndrimit të opozitës. SHBA-të duan të ndihmojnë vende të veçanta që të ecin më shpejt drejt anëtarësimit në BE, po nuk janë ata që vendosin proceset integruese.
Gjermania ka mbi shpatullat e saj procesin e Integrimit të Ballkanit Perëndimor, ka qenë më e fokusuar te Shqipëria, ka dhe një arsye tjetër që tre personazhe Rama-Thaçi-Vuçiç, kanë krijuar idenë e nënshrkrimit të një marrëveshje për kufijtë. Po këtu Gjermania dhe SHBA janë bashkë të cilët nuk duan që të ketë një ndryshim të kufijve.
Ky skenar nuk është pritur aspak mirë nga Gjermania, që e ka konsideruar këtë pakt të fshehtë një thikë pas shpine. Në takime konfidenciale zonja Merkel e ka bërë të qartë këtë qëndrim, zotit Rama i është hequr viza, Gjermania nuk do të vijë që të heqë nga karrigia zotin Rama. Qëndrimet janë të qarta, Gjermania i ka thënë Ramës: Na ngule thikën pas shpine, tani përballu me të vërtetën ashtu siç është”, u shpreh Islami në Fax News.
(E.K/FAXWEB.AL)
Discussion about this post