Teksa diskutohet lidhur me projektrezolutën e socialistëve për të shpallur nul vendimin e Metës për të dekretuar në Gjykatën Kushtetuese Marsida Xhaferllarin, deputeti Kujtim Gjuzi që në nisje të seancës ka kërkuar më shumë kohë që të njihej me materialin.
Kërkesa e tij ishte për 45 minuta kohë që ti hidhnin një sy rezolutës, por që iu mohua nga Gramoz Ruçi, pasi sipas tij materiali kishte qenë që prej ditës së djeshme në faqen zyrtare të Kuvendit.
“Jemi në seancë jashtë radhe, akoma nuk e kemi lexuar, do i kërkoja zotit Ruçi të paktën 45 minuta që ti hedhim një sy kësaj projektrezolute, zoti kryetar në lidhje me këtë procedurë të përshpejtuar, do të doja që të kishim më shumë kohë.”, u shpreh Gjuzi.
“E ke pasur në faqen zyrtare të Kuvendit, elektronika punon edhe në Korçë, edhe në Vithkuq, edhe në Maliq, edhe kudo”, u shpreh më tej Ruçi, ndërsa socialistët kanë nisur diskutimet lidhur me aktin e Metës.
(E.K/Faxweb.al)
