Pas ngjarjes së rëndë të ndodhur në fshatin Shëlli të Matit, ku Kujtim Koxha, vrau me kallashnikov 3 punonjës të Bashkisë dhe plagosi një tjetër, familjarët e vrasësit janë shpreur të turpëruar nga jo që ka ndodhur.
“Kujtimi na ka marrë fytyrën. Na ka turpëruar jo vetëm këtu në fshat e në zonë, por në të gjithë vendin. Që nga dita kur ndodhi ngjarja, ne nuk guxojmë të dalim as tek oborri i shtëpisë. Nuk e dimë pse e bëri dhe si e bëri atë krim të tmerrshëm. Edhe sikur të na falin familjarët e viktimave, ne nuk mund t’u dalim më para syve”, – janë shprehur familjarët e autorit të masakrës.
E ndërsa pjesëtarët e familjes Koxha kanë dënuar aktin e rëndë, vetë autori i krimit makabër nuk ka shprehur pendesë për marrjen e tri jetëve dhe lënien jetimë të fëmijëve të viktimave. Dy ditë më parë ai është justifikuar para oficerëve të policisë gjyqësore me fjalët se njëri nga viktimat e kishte fyer dhe e kishte qëlluar me shuplakë. “Njëri nga ata më qëlloi me shuplakë dhe më tha je i dehur. Më pas nuk mbaj mend se çfarë ka ndodhur”, është shprehur 51-vjeçari, i cili pohohet të jetë person problematik.
Nga ana tjetër, prokurori i çështjes është shprehur se të hënën do të kërkohet masa e sigurisë “Arrest me burg”.
“Ne kemi mbledhur të gjitha materialet e duhura. Kemi bërë dokumentimin e ngjarjes që ndodhi pak ditë më parë në fshatin Shëlli. Të hënën do të kërkojmë masën e sigurisë ‘Arrest me burg’ ndaj autorit të krimit”, tha prokurori.
Por ndërsa ngjarja e rëndë tronditi të gjithë opinion publik, Bashkia e Matit nderoi 3 viktimat e rënë në krye të detyrës.
Nga frika e ndonjë hakmarrje, policia ka marrë në mbrojtje familjen e autorit të vrasjes së trefishtë duke kryer shërbim përgjatë 24 orëve. Menjëherë pas ngjarjes, mësohet se familjarët e Kujtim Koxhës, janë ngujuar brenda 4 mureve.
Nga ngjarja e rëndë mbetën të vrarë:
1.Mentor Hoxha, 36 vjeç
2.Erzen Aliaj, 49 vjeç
3.Hamit Buçi, 52 vjeç
Ndërsa i plagosur mbeti, Astrit Hani, 40 vjeç.
(B.B/ Faxweb.al)
