17 punonjës të Kadastrës së Durrësit janë shoqëruar gjatë natës nga ana e policisë në qytetin bregdetar.
Burime bëjnë me dije për Faxweb.al se shoqërimi i tyre është kryer me urdhër të Prokurorisë së Durrësit, dhe derimë tani nuk ka asnjë urdhër-arresti.
Mësohet se punonjësit e Kadastrës do të pyeten lidhur me dosjen e pronave në Gjirin e Lalzit, për të cilat më herët u bë dhe arrestimi i drejtorit Liridon Pula, i cili u lirua më vonë nga ana e Gjykatës së Apelit. (Lexo edhe ketu lajmin)
Gjithashtu edhe nën drejtori Arben Isaku dhe nëdrejtoresha tjetër Lusiena Kola u arrestuan për t’u lënë më vonë të lirë nga gjykata.
Të tre zyrtarët u akuzuan nga prokuroria për shpërdorim detyre.
Pas arrestimit të Pulës, ndodhi dhe sulmi i paprecedentë i kryeministrit Edi Rama dhe zëvendësit të tij Erion Bracce në drejtim të prokurorit Arjan Ndoja, që sipas tyre ishte i lidhur me grupe kriminale në qytetin e Durrësit.
Por pavarësisht sulmeve frontale të ndërmarra nga qeveria, prokurori Ndoja nuk ka ndërmarrë asnjë hap pas nga çështja, ku tashmë hetimet janë zgjeruar dhe në radhët e punonjësve të tjerë të Kadastrës.
Mbetet për t’u parë si do të vijojë çështja, ndërsa sulmet e Ramës dhe të Braçes u dënuan dhe nga sindikata e gjyqtarëve, të cilët i cilësuan drejtuesit e qeverisë në tejkalim të kompetencave të tyre.
(E.K/Faxweb.al)
