Kryetari i Partisë Demokristiane, Nard Ndoka, ka deklaruar se ministrat teknikë nuk duhet të largohen nga qeveria deri në formimin e qeverisë së re. Ai ka dalë kundër leatëve të tij, Mediu dhe Shehi, të cilët thanë se largimi duhej të bëhej sa më shpejt.
Sipas Ndokës, qëndrimi deri në formimin e qeverisë së re i jep seriozitet marrëveshjes politike mes Ramës dhe Bashës.
“Normalisht, ajo është një marrëveshje politike, serioze dhe e rëndësishme për opozitën, pavarësisht problemeve që u evidentuan në zgjedhje me vjedhje vote etj. Unë mendoj se ministrat teknikë duhet të vazhdojnë detyrën që kanë marrë deri në ardhjen e qeverisë së re. Nuk besoj se ka ndonjë rëndësi tërheqja e tyre në këtë moment. Nuk është kjo pjesa më e rëndësishme për opozitën. Përkundrazi, qëndrimi deri në fund në detyrë i ministrave tregon respekt ndaj asaj marrëveshjeje që u votua edhe në Parlament. Këto janë thirrje të dëshpëruara dhe për të bërë politikë në 42 gradë celsius. Tërheqja e ministrave nuk i jep rëndësi dhe seriozitet marrëveshjes, që e thashë se ishte shumë e rëndësishme për opozitën. Vazhdimi i detyrës nga ana e ministrave është dhe një detyrim kushtetues dhe tërheqja nga detyra është edhe braktisje e përgjegjë- sisë që ata kanë marrë”, ka thënë Ndoka në një prononcim për “Panoramën”.
I pyetur nëse e sheh të mundshme një bashkëqeverisje mes PS-së dhe PD-së, kreu i PDK u shpreh:
“Kjo kërkon një debat politik më të gjerë, por nuk mendoj se është në interes të opozitës një bashkëqeverisje e PD-së me PS-në. Nisur nga problematikat që u panë dhe u evidentuan në zgjedhje, unë e shoh një mision të pamundur bashkëqeverisjen”. (B.H/Shuplaka)
Discussion about this post