Kryeqyteti i Shqipërisë Tirana, do ta presë në një mënyrë të veçantë Vitin e Ri 2017-të.
Qytetarët do të kenë mundësinë që të presin orën 00:00 në sheshin “Nënë Tereza” nën spektaklin e fishekzjarrëve dhe muzikës në sfond të organizuar nga Bashkia.
Ndërrimi i viteve do të jetë një çast i paharrueshëm për të gjithë qytetarët e Tiranës të cilët do të festojnë në kryeqytet- shkruan në njoftimin e saj Bashkia e Tiranës.
Përmes këtij njoftimi Drejtoresha e Përgjithshme e Promovimit të Qytetit, Julinda Dhame, ftoi të gjithë qytetarët e Tiranës që t’i bashkohen koncertit të organizuar për natën e ndërrimit të Viteve në sheshin “Nënë Tereza”.
“Sot Bashkia e Tiranës organizon një koncert të madh festiv në Sheshin “Nënë Tereza”, duke nisur nga ora 23:30 deri në orën 01:30 pas mesnate. Ju ftojmë ta festojmë të gjithë bashkë natën e ndërrimit të viteve, një spektakël i madh fishekzjarrësh, me këngëtarë të njohur të skenës shqiptare”- tha Dhame.
Të pranishëm në këtë spektakël do të jenë dy prezantueset bukuroshe të “Top Channel”, Luana dhe Marina Vjollca, gjithashtu artistët që do të përformojnë si, Klajdi Selimi, Majk & Onat, Dren Abazi së bashku me Zig Zag Orkestra.
Atmosferës nuk do t’i mungojnë edhe talentet e “Tirana Art Fest” dhe Akrobatët e Cirkut Kombëtar.
Pa harruar pjesën më të rëndësishme, momentin e numërimit mbrapsht të akrepave të orës nga kryetari i Bashkisë, Erion Veliaj së bashku me qytetarët e Tiranës.
Discussion about this post