Analisti Shpëtim Nazarko ka komentuar situatën politike në vend, dhe konkretisht deklaratat e deputetit Ben Blushi gjatë seancës së sotme plenare. Në rubrikën “Opinion”, Nazarko tha se deklaratat e Blushit nuk janë realiste, por të ndikuara nga interesat e tij.
Sipas Shpëtim Nazarkos, kreu i LSI-së, Ilir Meta, nuk ka fuqi të ndikojë në vendimet e kryeministrit Rama.
“Sa i takon deklaratave të Blushit sot në Kuvend, do të thoja se i komenton situatat sipas interesit të vet. Blushi i bën llogaritë sipas dëshirës së vet. Edhe LSI nuk e ka marrë shumë të fortë manovrën. Dhe ky marzh manovrimi nuk është aq i fortë sa të prishë balancën. Mendoj se Blushi nuk ka të drejtë kur thotë se Meta ka fuqi të ndikojë mbi Ramën”, tha Nazarko.
Duke komentuar deklaratat e kryedemokratit Basha sa i takon kërkesave të përsëritura tashmë në 28 ditët e protestës, Nazarko thotë se opozita po vetëvritet në shesh. Sa i takon takimeve të Bashës me ambasadorët, Nazarko thotë se këto takime janë thirrur nga kryedemokrati.
“Basha sot tha se kauza e opozitës po shkon drejt realizimit. Por thirrja e Bashës për ambasadorët, me të cilët është takuar disa herë ditët e fundit, duket më shumë si sinjal i tij për të qetësuar aleatët. Nuk e thërrasin ambasadorët Bashën, por Basha ata. Duket edhe se diplomacia është pezull në këtë pikë”, u shpreh Nazarko.
“Këto partitë 25 vjeçare kanë mbaruar ciklin, si Les Valesa në Poloni. Këta kanë zbërthyer rripat e mesit edhe në brezin e deputetëve të vjetër dhe të rinj, kanë gjetur një mënyrë interesante me çadrën. Fjalimi i Berishës sot më kujtoi kur shqiptarët kërkonin një armik të madh, duke u kapur pas Soros. PD ka ende shanse, ka marrë 500 mijë vota, t’i diskutojë shanset, të shikojnë të vërtetat e saj në sy edhe pse kjo parti ka marrë tatëpjetën e madhe që nga 2011, ka mbaruar misionin e saj historik” tha Nazarko duke iu referuar aksionit politik të opozitës dhe shanseve të saj në zgjedhje.
(M.D/ Shuplaka)
Discussion about this post