Ndahet nga jeta në moshën 87-vjeçare “Legjenda e boksit”, Theodhor Janku (FROFIL)

Ndahet nga jeta ish-boksieri Theodhor Janku i njohur oër të gjithë so Todi.   Ish-boksieri është ndarë nga jeta në moshën 87-vjeçare pas një sëmundje. 

Todi Janku, mbreti i boksit shqiptar, ka lindur më 8 janar 1930 në Tiranë.  Që në moshën 12-vjeçare ka nisur punën e tij në profilin e marangozit. Edhe si marangoz morri  titullin “Mjeshtër në profesion”.

Ai ka kontribuar në shumë vepra të ndryshme e në veçanti në panairet ndërkombëtare të organizuara në shumë vende të Evropës, Afrikës, Lindjes së Mesme nga dhoma e tregtisë në Shqipëri. Në moshën 17-vjeçare, Todi Janku merr pjesë në aksionin kombëtar për ndërtimin e hekurudhës Peqin-Durrës-Tiranë. Më pas shkon vullnetar në ndërtimin e autostradës Beograd-Zagred në ish-Republikën e Jugosllavisë. Në këto aksione, Janku i madh i dorezave shqiptare ka marrë shumë fleta lavdërimi, sulmuese e dekorata të ndryshme.

Përveç kësaj, Todi Janku është një figurë e ndritur e sportit shqiptar e në veçanti e boksit shqiptar. Sportin e dorezave e ka ushtruar në vitet 1952-1963. Në vitin 1956 është titulluar si  “Mjeshtër Sporti”. Nga viti 1956 dhe deri më 1963 ishte trajner i Tiranës në boks. Boksier, kapiten i Tiranës dhe më pas i ekipit kombëtar të të rriturve. Në vitin 1971, Mjeshtër i Merituar i Sportit. U dekorua me urdhrin “Naim Frashëri” të klasit të parë më 7 dhjetor 1995.

Në karrierën e tij, Todi Janku është fitues tre herë i anketës së 10 sportistëve më të mirë në vitin 1959, 1960, 1961. Jo vetëm kaq, por është fitues i anketës “Boksieri më i mirë i shekullit| më 1996, si dhe super-anketës “10 sportistët më të mirë të shekullit” më 1998. Për 12 vjet rresht është “kampion kombëtar”, fitues i Kupës së Republikës, pikërisht në vitet 1952-1963. Më 1999 është nderuar me titullin “Nderi i sportit shqiptar”, kurse në 2000-n nga Bashkia e Tiranës ka marrë titullin “Mirënjohje e qytetit të Tiranës”.

Në kuadrin e Lojërave Olimpike “Athinë 2004”, Komiteti Olimpik Kombëtar Shqiptar e ka vlerësuar me urdhrin olimpik. Është nderuar me titullin “Mirënjohje” nga Federata Shqiptare e Boksit në vitin 2004, si dhe nga klubi sportiv Tirana më 2012. I është akorduar me vendim të Këshillit të Ministrave pensioni e posaçëm. Që nga viti 1991 është anëtar i grupit nismëtar për rilindjen dhe riorganizimin e boksit shqiptar, kurse për shumë vite ka qenë edhe anëtar i Komitetit Drejtues të kësaj Federate.

Që nga viti 2001, Klubi Shumësportësh “Tirana” për nder të Todi Jankut organizon turne boksi për nder të tij. Në karrierën e tij, Todi Janku numëron 82 ndeshje, 6 ndërkombëtare, prej të cilave 80 i ka fituar përpara kohe me nokaut, kurse dy të tjera i ka me pikë.  (J.V/Shuplaka)