Ambasada e Shteteve të Bashkuara të Amerikës në Prishtinë mbështet veprimet e qeverisë kosovare për të ndaluar trenin që ishte nisur nga Beogradi drejt Mitrovicës.
Përmes një deklarate, Ambasada amerikane thotë se Kosova ka të drejtë t’i kontrollojë kufijtë e vet.
“Kosova është një shtet sovran e i pavarur dhe ne e respektojmë të drejtën e Kosovës që ta kontrollojë se kush dhe çka kalon në kufijtë e saj. Jemi të lumtur që nuk pati konfrontime në kufi, por askush nuk përfiton nga rritja e nacionalizmit”, thuhet në deklaratë.
Por Ambasada u ka bërë thirrje palëve që t’i shmangin konfrontimet dhe të angazhohen në dialog.
“SHBA-të e mbështesin fuqishëm dialogun e ndërmjetësuar nga Bashkimi Europian si rruga më e mirë përpara për marrëdhëniet Kosovë- Serbi dhe kërkojmë nga të gjitha palët që ta shmangin retorikën e rrezikshme dhe të vazhdojnë të punojnë në normalizimin e marrëdhënieve dhe të jetëve të qytetarëve të të dyja vendeve”.
“Ne sot kremtojmë ditëlindjen e Dr. Martin Luter King Jr., i cili ka thënë “gjithmonë është koha e duhur për të bërë gjëra të duhura”, tani është koha të punohet për bashkëpunim dhe kundër konfrontimeve”, tha Ambasada amerikane në Kosovë. (A.R/SHUPLAKA)
Discussion about this post