Pronari i një firme në Durrës është ndaluar nga forcat e policisë pas konstatimit se kishte fshehur një aksident në ambientet e punës. Bëhet fjalë për dëmtimin e një punëtore 19-vjeçare, e cila rezulton e pasiguruar nga pronari i saj.
Është ndaluar Bardhyl Murati 61 vjeç, banues në Durrës, për dëmtimin e punëtores G. Gj. 19 vjeç, banuese në Durrës. Mësohet se pronari i firmës nuk ka paraqitur asnjë dokument lidhur me sigurinë e punonjëses dhe as nuk ka njoftuar policinë lidhur me ngjarjen.
Njoftimi i Policisë së Durrësit
Specialistët për Krimet në Komisariatin e Policisë Durrës bënë të mundur ndalimin e shtetasit: Bardhyl Murati, 61 vjeç, banues në Durrës, drejtues administrativ në një firmë këpucësh.
Më datë 16.12.2016, në lagjen Nr.14, Durrës, në firmën e këpucëve , duke punuar është dëmtuar një punëtore, shtetësia G.Gj. 19 vjeçe, banuese në Durrës.
E dëmtuara ndodhet në Spitalin”Nënë Tereza”Tiranë jashtë rrezikut për jetën.
Murati, nuk ka paraqitur asnjë akt apo dokument që lidhet me sigurinë në punë të punonjësve.
Gjithashtu, nuk ka njoftuar Policinë e Shtetit dhe Inspektoriatin e Punës mbi ngjarjen e mësipërme.
Materialet i kaluan Prokurorisë së Rrethit Gjyqësor Durrës për veprime të mëtejshme për veprat penale”Shkelja e rregullave të mbrojtjes në punë” dhe “Veprime që pengojnë zbulimin e së vërtetës” parashikuar në nenet 289 dhe 301 të Kodit Penal.
(XH.A/SHUPLAKA)
