Lulzim Basha ka shprehur ngushëllimet etij për ndarje nga jeta të ish-kryeministrit kosovar Bajram Rexhepit. Basha ka theksuar se Bajram Rexhepi ishte njeri i veçantë dhe shqiptar i madh.
“Bajram Rexhepi ishte njeri i veçantë dhe shqiptar i madh. Pak njerëz i kanë shërbyer popullit të tyre si ai, duke u kujdesur me përkushtim si mjek për jetët e njerëzve, duke luftuar për lirinë e tyre dhe duke drejtuar përpjekjet e tyre për demokraci dhe përparim.
Kam patur nderin të takohem shpeshherë me Bajramin dhe do të ruaj përherë brenda meje mbresat e pashlyera për dinjitetin, përunjësinë dhe mirësinë e tij.
Në këto momente të dhimbshme të ndarjes së tij të parakohshme nga jeta bashkoj lutjet e mia me ato të familjarëve dhe miqve të tij. U prehtë në paqe! I paharruar kujtimi i tij!”, shprehet Basha.
Rexhepi ka vdekur sot në orët e hershme të mëngjesit.
Prej muajsh ai ndodhej në koma dhe ishte duke qëndruar në njërin prej spitaleve në Turqi pas hemoragjisë cerebrale që kishte kaluar në tru.
Ai fillimisht ishte shtruar në Qendrën Klinike Universitare të Kosovës ku edhe i është nënshtruar operacionit mirëpo për shkak të gjendjes së rëndë ishte transferuar në Turqi. (J.V/Shuplaka)
