Presidenti Bajram Begaj ka reaguar pas ndarjes nga jeta të diplomatit të shquar, Shaban Murati, i cili mbylli sytë përgjithmonë mëngjesin e sotëm.
Kreu i Shtetit shkruan se Shaban Murati ishte një intelektual, diplomat, historiani politik, njohës i shkëlqyer i gjeopolitikës rajonale, si edhe një mik i tij.
“Shaban Murati, burri fisnik që atdheun e kishte të shenjtë dhe gjithmonë me vete, do të mbetet mes nesh si veprimtari i përhershëm që foli, shkroi dhe ndau dijen për të na orientuar në anën e të mirës dhe të drejtës në histori”, shprehet Begaj.
Presidenti thekson se Shaban Murati iku i bekuar duke lënë pas, veç tre bijve, pasardhës të denjë të tij, edhe vepra të rralla.
Postimi i Begajt:
Me dhembje mësova lajmin për ndarjen nga jeta të intelektualit, diplomatit, historianit politik, njohësit të shkëlqyer të gjeopolitikës rajonale, mikut tim, Shaban Murati.
Çdo bisedë që zhvillova me të, çdo këshillë që më jepte, ishte e hapur, e drejtpërdrejtë dhe e vyer.
Shaban Murati, burri fisnik që atdheun e kishte të shenjtë dhe gjithmonë me vete, do të mbetet mes nesh si veprimtari i përhershëm që foli, shkroi dhe ndau dijen për të na orientuar në anën e të mirës dhe të drejtës në histori.
Shaban Murati iku i bekuar duke lënë pas, veç tre bijve, pasardhës të denjë të tij, edhe vepra të rralla për ne!
Shpirti t’u prehtë në paqe, i miri Shaban Murati!
