Presidenti i Republikës Bujar Nishani shpreh ngushëllimet për ndarjen nga jeta të këngëtarit Françesk Radi.
Në mesazhin e tij ngushëllues, Nishani shprehet se me largimin e parakohshëm nga kjo jetë të admiruesve të Radit do t’u mungojë intepretuesi virtuoz.
“Të dashur familjarë të Françeskut të ndjerë,
Me hidhërim dhe dhimbje të thellë mësova lajmin e hidhur të ndarjes nga jeta të njeriut tuaj të shtrenjtë e të pazëvendësueshëm.
Më lejoni që në këtë ditë të dhimbshme t’ju shpreh ngushëllimet më të sinqerta, edhe në emër të qytetarëve shqiptarë, duke ju siguruar se në cilësinë e Kreut të Shtetit gjendem shpirtërisht pranë jush në këto çaste tejet të vështira e të trishtueshme!
Me largimin e parakohshëm nga kjo jetë të Françeskut të ndjerë, muzikës shqiptare, kolegëve dhe admiruesve të tij do t’u mungojë intepretuesi virtuoz, këngëtari i rrallë, tekstshkruesi gjenial, muzikanti i talentuar dhe autori i paarritshëm i një krijimtarie të pasur këngësh e kompozimesh, që pasuron cilësisht e në mënyrë origjinale thesarin e trashëgimisë muzikore bashkëkohore e shpirtërore të popullit shqiptar.
Edhe një herë ngushëllimet më të ndjera dhe Françeskut i pastë dritë shpirti përjetësisht! Bujar Nishani”, thuhet në mesazhin e ngushëllimit të Nishanit. (D.D/Shuplaka)
Discussion about this post