Presidenti i Republikës, Ilir meta ka shprehur ngushëllimet e tij për familjen e Sadije Agollit bashkëshortës së shkrimtarit Dritëro Agolli, e cila u nda nga jeta në moshën 76-vjeçare.
Meta thotë se Sadije Agolli do të mbetet në kujtesë si mishërim i shkëlqyer i vlerave më të mira të nënës dhe gruas shqiptare.
“Me ndarjen nga jeta të Sadijes, të gjithë ne që e njohëm çiftin e pandarë Agolli, humbëm një mike të mrekullueshme, të dashur, të mençur e mikpritëse si ajo”, – shkruan Meta në rrjetet sociale.
Statusi i plotë:
Me dhimbje e pikëllim të thellë mësova lajmin tronditës të ndarjes nga jeta të Sadije Agollit.
Si bashkëshorte e përkushtuar, e palodhur dhe gjithmonë në krah të Dritëroit tonë të madh e të paharruar, Sadija e dashur do të mbetet në kujtesën tonë si mishërimi i shkëlqyer i vlerave më të mira të nënës dhe gruas shqiptare.
I shpreh ngushëllimet më të sinqerta, Elonës dhe Artanit, familjarëve e të afërmve! Me ndarjen nga jeta të Sadijes, të gjithë ne që e njohëm çiftin e pandarë Agolli, humbëm një mike të mrekullueshme, të dashur, të mençur e mikpritëse si ajo!
U prehtë në paqe!
Sadije Agolli ka ndërruar jetë në spitalin e Neurologjisë, pas disa komplikacioneve që kishte pasur me shëndetin e saj.
Kujtojmë se në muajin Shkurt të 2017-tës u nda nga jeta dhe vetë shkrimtari i madh, Dritëro Agolli.
Në dy vjetorin e ndarjes nga jeta të bashkëshortit të saj, Sadija në një intervistë dhënë për mediat, tregonte se ende jetonte me kujtimet e tij, me veprat, porositë e personazhet aq të dashura për lexuesin.
(F.GJ/FAXWEB.AL)
