Partia Demokratike ka reaguar në lidhje me ndërhyrjen amerikane në Siri. Sot gjatë orëve të para të mëngjesit Marina Amerikane me bazë në Mesdhe ka goditur me 56 raketa aeroportin ushtarak nbë Siri.
Kjo ndërhyrje ka gjetur përkrahjen e shumicës së vendeve Europiane dhe është kundërshtuar fort nga Rusia. Nga ana tjetër dhe Ministri i jashtëm Bushati është shprehur pro ndërhyjres amerikane për të shpëtuar jetët e pafajshme të fëmijëve.
DEKLARATA E PLOTË E PARTISË DEMOKRATIKE:
Presidenti Trump urdhëroi sot në orët e para të mëngjesit goditjen me 59 raketa tomahok të bazës ushtarake në Siri, prej ku u lëshuan pak ditë më parë bombat me gaz helmues që shkaktuan vdekjen e dhjetëra civilëve mes tyre dhe shumë fëmijë.
Përveçse një operacion me efektivitet të lartë ushtarak, kjo është një përgjigje e drejtpërdrejt ndaj një diktatori i cili nuk kursen jetë civilësh të pafajshëm për t’i shërbyer pushtetit të tij.
Përgjigja amerikane është edhe një shpresë e rindezur se rendi demokratik botëror në mbrojtje të jetës dhe të drejtave e lirive të njeriut ka garant vendin më të fuqishëm dhe demokratik të globit, SHBA.
Urdhri i presidentit Trump është një konfirmim i lidershipit moral të padiskutueshëm të SHBA në zhvillimet ndërkombëtare.
Partia Demokratike përshëndet këtë akt të jashtëzakonshëm në mbrojtje të jetës dhe dinjitetit njerëzor dhe ndihet krenare për partneritetin unik strategjik me SHBA dhe Presidentin Trump.
Partia Demokratike do të jetë përherë në krah të SHBA dhe nesër në qeverisjen e vendit do ta ngrejë këtë partneritet në nivelet më të larta historike.
Discussion about this post