Ndërkombëtarët, Spahiu: Hahn nuk e ka idenë fare, nuk jam pajtuar me dy gjëra me PD

Në “Të PaEkspozuarit”  kreu i Aleancës Kuqezi Kreshnik Spahiu  tha se “Hahn nuk e ka fare idenë fare në kërkesat popullore”.

Kjo sipas tij pasi këto kërkesa nuk janë vetëm të PD-së por të të gjithë spektrit politik opozitar dhe popullit që i mbështet.

Pjesë nga fjala e Spahiut:

Hahn duket që nuk ha pykë fare në kërkesat popullore dhe jo të PD-së, se nuk është kërkesë vetëm e PD-së kjo. Në Shqipëri janë gjithsej 127 parti politike. Në zgjedhjet e 2013 morën pjesë 66 parti, kurse tani janë 15. Nuk kemi më koalicione ne siç parashikon Kushtetuta.

Rama për të krijuar opinionin e një Shqipërie pluraliste, prishi dhe koalicionin e vitit 2013 me Metën. Sot përveç se 1.7 mln votuesve në emigracion që nuk iu garantohet vota,  janë përjashtuar rreth 900 mijë votues të tjerë që përfaqësohen nga 100 e ca parti politike të tjera ku futen PD, PR, LZHK.

Hahn nuk e ka idenë fare se çfarë po ndodh me zgjedhjet, se ndërkombëtarëve nuk u kërcet fare për të drejtat e njeriut, por kanë vetëm një problem: Stabilitetin. Për stabilitetin i vënë flakën të gjitha parimeve njerëzore.

Hahn mendoj se është 100% gabim. Unë nuk jam pajtuar me dy gjëra me PD që në fillim.  PD i mban ison ndërkombëtarëve, duke i hiperbolizuar ata, që duket sikur i vënë vulën procesit të zgjedhjeve në Shqipëri dhe se OSBE/ODIHR duhej të përcillej me kohë nga Shqipëria.

(M.D/Shuplaka)