Ndërpritet fushata, sot Kuvendi në seancë të jashtëzakonshme. A do të ketë një përballje Rama-Meta?

Ndërpritet fushata, sot Kuvendi në seancë të jashtëzakonshme. A do të ketë një përballje Rama-Meta?

Sot shumicës së deputetëve do t’iu duhet të ndëpresin fushatën e tyre në rrethe. Kjo pasi Kuvendi pritet të mblidhet sot në një sesion të jashtëzakonshëm plenar, seancë në të cilën do të bëhet edhe zëvendësimi i përfaqësueses së PD-së në komisionin “ad hoc” për vettingun, Jorida Tabaku.

Kjo e fundit nuk mund të jetë e pranishme në mbledhjet e Komisionit të Vettingut, pasi pak ditë më parë ka sjellë në jetë dy vajzat e saj binjake.

Mësohet se seanca plenare do të nis rreth orës 10:00, ndërsa në orën 14:00, do të ketë një tjetër seancë ku do të votohen anëtarët e Kolegjit të Apelimit dhe të Komisionit të vettingut.

“Në bazë të nenit 74, pika 2 të Kushtetutës së Republikës së Shqipërisë dhe nenit 42, pika 2 të Rregullores së Kuvendit, një e pesta e deputetëve të Kuvendit të Shqipërisë, nga të gjitha Grupet Parlamentare kanë depozituar sot, me shkresën Nr. 1553 Prot, kërkesën për thirrjen e sesionit të jashtëzakonshëm ditën e shtunë, datë 17 qershor 2017, drejtuar Kryetarit të Kuvendit”, u njoftua dy ditë më parë nga Kuvendi.

Nuk pritet ndonjë pjesëmarrje e lartë por interesante do të ishte dhe një përballje mes kryeparlamentarit Meta dhe kryeministrit Rama pas disa javësh mjaft të nxehta mes tyre. Po për të ndodhur kjo ata do të duhet të jenë të pranishëm të dy në Kuvend. (E.K/SHUPLAKA)