Seanca gjyqësore e radhës në kuadër të procesit “Plumbi i Artë” është ndërprerë këtë të mërkurë, pas largimit të avokatit Gentjano Rumano, i cili përfaqëson ligjërisht të pandehurin Henrik Hoxhaj.
Largimi i papritur i avokatit bëri që trupa gjykuese të vendosë gjobitjen e tij me 100 mijë lekë, si masë administrative për ndërprerje të seancës pa një arsye të justifikuar zyrtarisht.
Gjykata bëri të ditur se seanca e radhës do të zhvillohet më 8 korrik, në orën 10:00, ku pritet të vijojë me dëshminë e bashkëpunëtorit të drejtësisë, Skerdi Tase, një nga dëshmitarët kyç të prokurorisë në këtë çështje.
Procesi “Plumbi i Artë” përfshin një numër të madh të pandehurish dhe konsiderohet një nga hetimet më të rëndësishme të viteve të fundit, për shkak të lidhjeve të dyshuara mes krimit të organizuar dhe funksionarëve publikë.
