Sektori i ndërtimit po përjeton ndoshta ditët më të vrullshme të tij të post-krizës dhe këtë e konfirmojnë dy tregues, ai për lejet e ndërtimit të cilat vetëm në Tiranë për janar-qershor 2017, u trefishuan sipas INSTAT, dhe së dyti projektet ambicioze të bëra publike nga vetë ndërtuesit që kanë kthyer vendin në një kantier në shumë zona.
E vetmja që duket se nuk po konfirmon këtë trend të ndërtimit është Banka e Shqipërisë. Pritshmëria do të ishte që ashtu sikurse konfirmojnë dy të dhënat e mësipërme, lejet dhe projektet në zbatim, edhe Banka të konfirmonte një rritje të kredisë për sektorin, por nuk ka ndodhur kështu.
Gjatë prezantimit të raportit për Stabilitetin Financiar për 6 muajt e parë të vitit 2017, Banka e Shqipërisë vlerëson se teprica e kredisë për sektorin e ndërtimit nuk ka ndryshuar. Gjithsesi Banka konfirmon se kredia e re ka tendencë rritjeje.
Pjesa e kredive të kolateralizuara me pasuri të paluajtshme është rritur lehtë në gjashtë muajt e parë të këtij viti. BSH konfirmon edhe një rritje të kostos së kredisë për pasuri të paluajtshme ndërkohe që kemi një rënie të raportit të kredive me probleme në raport me dhjetorin e 2016.
Ata që duket se kanë rritur kërkesën për financim nga bankat për pasuri të paluajtshme janë individët ndërkohe që edhe kushtet janë lehtësuar pikërisht për këtë grup nga ana e bankave.
Nga ana tjetër, rënia e kredisë në total për biznesin reflekton sipas bankës qendrore ristrukturimin dhe efektin e forcimit të lekut.
Kreditë me probleme
Banka e Shqipërisë raporton se teprica e kredive me probleme ra me 15.2%, duke shënuar 93 miliardë lekë në fund të 6-mujorit të parë të vitit
“Si rezultat, raporti i kredive me probleme arriti në 15.6% duke qenë 2.2 pikë përqindje më i ulët në krahasim me fundin e vitit 2016 dhe 4.4 pikë përqindje më i ulët në krahasim me një vit më parë. Si pasojë e shlyerjeve dhe ristrukturimit, portofoli i kredive nënstandard dhe atyre të dyshimta me përkatësi 15.6% dhe 32.8%. Kreditë e humbura që përfaqësojnë 60% të kredive me probleme, ranë me 9.3% për shkak të fshirjeve.
Përmirësimi i cilësisë së kredisë është raportuar kryesisht nga bankat e mëdha, të cilat kanë rreth 61% të tepricës së kredive me probleme. Stoku i kredive me probleme të bankave të mëdha ra me 17.2% dhe raporti i kredive me probleme ra me 2.8 pp, në nivelin 14.9%. Bankat e mëdha kanë raportin më të ulët të kredisë me probleme, ndërsa bankat e vogla raportin më të lartë (24.6%). Ky raport ishte 1.9 pp më i ulët se sa në fund të vitit 2016”, vlerëson BSH./Monitor
Discussion about this post