Banda e shqiptarëve të arrestuar për trafikim të lëndëve narkotike, janë dënuar nga drejtësia italiane pas një hetimi të gjatë.
Anëtarët e bandës në fjalë, transportonin kokainë nga Shqipëria drejt Italisë. Mediat italiane shkruajnë se bosi i kësaj bande është shqiptari Rigent Borakaj, i njohur si Genti.
Gjykatësi në gjykatën e Xhenovas, Massimo Deplano vendosi të dënojë kreun e kësaj bande, shqiptarin Rigent Borakaj, 30 vjeç, me 11 vite burg, ndërsa bashkëpunëtorin e tij Konjoni Zija, i njohur si Ani, u dënua me 8 vite burg.
Anëtari i bandës Giancarlo Perrone, 51 vjeç u dënua me 6 vite burg. Hetimet e policisë italiane kanë nisur që në vitin 2013, ndërsa Rigent Borakaj kishte lidhje me një anëtar të një organizate në Vlorë, që e furnizonte me kokainë dhe lëndë të tjera narkotike. Pasi mbërrinte në Itali, lënda narkotike trafikohej në komunën Chiavari si dhe në rrethinat e Xhenovës.
Sakaq, mësohet se Borakaj ka ndërtuar në Shqipëri një shtëpi me vlerë 300 mijë euro si dhe ka kursyer edhe 100 mijë euro të tjera nga ky aktivitet i paligjshëm. (D.D/Shuplaka)
