Pas më shumë se 7 muajsh nga shkarkimi i tij në Kuvend, Presidenti i vendit Ilir Meta pritet që të njihet sot me vendimin e Gjykatës Kushtetuese për fatin e tij. Kushtetuesja do të shprehet në rast se shkeljet e pretenduara të presidentit ndaj Kushtetutës, janë aq të rënda sa do të përligjnin shkarkimin e tij.
Seanca pritet që të nisë në orën 10:00, ku vetë presidenti Meta ka njoftuar se nuk do të jetë i pranishëm, por do të përfaqësohet nga juristë të tjerë. Kjo është hera e parë në historinë e pluralizmit politik, që presidenti i vendit çohet në Gjykatën Kushtetuese dhe shkarkohet nga Kuvendi.
Shkak për nisjen e procedurave të shkarkimit të Metës, u bënë përplasjet me mazhorancës, qoftë për zgjedhjet lokale të 2019, qoftë me dhjetra dekrete që presidenti ka kthyer pas në Parlament, përfshirë dhe mbajtjen ‘peng’ të emërimit të disa ministrave. Pika kulmore arriti në zgjedhjet e 25 Prillit, ku presidenti akuzohet se ka mbajtur qëndrime në fushatë dhe është përfshirë në mënyrë intesiven me takimet dhe deklaratat e tij.
Sipas maxhorancës, Presidenti i Republikës ka kryer në mënyrë të përsëritur disa akte dhe sjellje, të cilat në vlerësimin e deputetëve përbëjnë shkelje të rënda dhe flagrante të Kushtetutës.
“Në abuzim të kompetencave kushtetuese dhe ligjore, si dhe në kushtet e shkeljes së rëndë dhe flagrante të Kushtetutës, z. Ilir Meta para, gjatë dhe pas periudhës së fushatës zgjedhore 2021, me veprimet, sjelljet dhe mesazhet e dhëna në publik nuk ka garantuar unitetin kombëtar, ka nxitur konfliktin politik.
Deklaratat dhe mesazhet e intensifikuara të Presidentit në atë periudhë qartazi favorizojnë partitë opozitare dhe njëkohësisht denigrojnë maxhorancën, duke cenuar kështu rëndë barazinë e konkurrimit politik dhe duke shkelur paanësinë politike që Kushtetuta i ka veshur Presidentit të Republikës. Mesazhet publike të Presidentit një ditë para ditës së votimit, e rregulluar ligjërisht si dita e heshtjes zgjedhore në respekt të së drejtës kushtetuese të individëve për të zgjedhur.
Mesazhe denigruese ndaj përfaqësuesve të lartë të misioneve diplomatike në Shqipëri si persona të shituar e të blerë nga maxhoranca apo Kryeministri, cenuan rëndë të drejtat kushtetuese të individëve, imazhin dhe reputacionin e vendit dhe marrëdhëniet me partnerët strategjike të Shqipërisë si BE-ja dhe SHBA-ja”, thuhej mes të tjerave në arsyetimin e Kuvendit për shkarkimin e Metës.
Discussion about this post