Nis protesta e katërt e madhe e opozitës së bashkuar ndërsa mijëra protestues janë mbledhur para kryeministrisë. Kreu demokrat Lulzim Basha i është bashkuar marshimit drejt Kryeministrisë, ndërsa më parë takoi studentët evropianë demokratë.
Gjithashtu dhe Monika Kryemadhi, kryetarja e LSI-së është nisur nga selia e kësaj partie për t’iu bashkuar protestës.
Fillimisht nga zona e Astirit erdhën banorët të cilët protestojnë tashmë prej shumë muajsh në mbrojtje të banesave të tyre të planifikuara për tu shembur në kuadër të projektit për Unazën e madhe.
Më pas nga drejtime të ndryshme drejt sheshit para kryeministrisë janë drejtuar grupe grupe mbështetësish të opozitës.
Gjithashtu edhe Aleanca për Mbrojtjen e Tetarit i është bashkuar protestës.
Ndërkohë dëgjohen vazhdimisht dhe thirrjet “Rama ik”, “Mbro Teatrin”, “E duam Shqipërinë si gjithë Evropa”.
Gjithashtu kanë filluar të hidhen dhe shashkat e para ndërsa janë hedhur dhe disa tymuese nga vetë protestuesit.
Në gardhin mbrojtës me policë para Kryeministrisë një burrë i moshuar është përplasur me policinë, ndërsa është qetësuar nga protestuesit e tjerë. Gjithashtu tymuese dhe bojë është hedhur drejt godinës së Kryeministrisë, ndërsa policia bën vazhdimisht thirrje për shmangie të dhunës.
Kjo është protesta e katërt kombëtare e cila zhvillohet përpara kryeministrisë nga opozita e bashkuar, që prej vendimit për të djegur mandatet e deputetëve të PD-së dhe të LSI-së.
Kërkesat e partive opozitare janë të qarta, dhe lidhen me mbajtjen e zgjedhjeve pa Edi Ramën kryeministër, dhe krijimin e një qeverie tranzitore, e cila do të mundësojë mbarëvajtjen e tyre.
Me kalimin e javëve vendosen në pikëpyetje dhe zgjedhjet lokale të 30 Qershorit, që sipas opozitës nuk do të mbahen, ndërsa qeveria Rama dhe PS janë angazhuar me zgjedhjen e kandidatëve në mbledhjen e sotme të Asamblesë.
Discussion about this post