Policia Bashkiake dhe Spitali Rajonal i Kukësit kanë pasur një përplasje mes tyre ditën e sotme, për shkak të punimeve që po bëhen për rikonstruksionin e ambienteve të kuzhinës së këtij institucioni.
Sipas administratës së këtij spitali, policët bashkiakë kanë shkuar në ambientet e kuzhinës dhe kanë shoqëruar njërin prej punëtorëve, me pretekstin se nuk është njoftuar bashkia për punimet që po bëhen, duke e konsideruar atë ndërtim pa leje.
Nga ana tjetër sipas punonjësve të spitalit, ambientet e kuzhinës janë duke u rikonstruktuar dhe se nuk është bërë asnjë shtesë ndërtimi, siç pretendon bashkia për ndërtim pa leje.
Mësohet se ambientet e kuzhinës së spitalit rajonal të Kukësit po rikonstruktohen nga dy kompani private, për të krijuar kushtet e nevojshme për pacientët dhe gjithë stafin.
Kujtojmë se kjo kuzhinë nuk është rikonstruktuar që në kohën e ndërtimit të spitalit rajonal të Kukësit, aty ku marin shërbim shëndetësor banorë të Kukësit, Hasit,Tropojës dhe Pukës. (E.V/Faxweb.al)
Discussion about this post