Ujërat e lumit Gjanicë janë ndotur sërish nga derdhja e mbetjeve të naftës bruto të cilat kanë dalë në sipërfaqe si pasojë e reshjeve intensive të nisura mbrëmjen e djeshme.
Kjo situatë ka nxjerrë në terren inspektorët e mjedisit për të verifikuar nga afër pikat e ndotjes dhe shkaktarët e kësaj situate alarmante.
Sipas drejtorit të agjencisë rajonale të mjedisit, Denis Vogli, dyshohet se ndotja mund të jetë shkaktuar nga mbetjet historike të naftës të kompanive naftënxjerrëse që operojnë në zonë , teksa nuk ka përjashtuar edhe mundësinë e një shkarkimi të qëllimshëm.
Edhe pse policia i ka shpallur luftë ndotjes së lumit Gjanicë, një fenomen i përsëritur në këtë qytet duke vënë në pranga përgjegjësit e kompanive të naftës që operojnë në zonë, dhe që shkarkuan ndotjet në lum, duke prishur sistemin ekologjik të tij, ky shqetësim vijon të jetë ende i pranishëm.
