Aktori i mirënjohur i skenës shqiptare, Ndriçim Xhepa, pranon se disa filma të caktuar të realizuar përpara viteve ’90, fyejnë kategori të caktuara njerëzish që janë prekur deri në palcë nga diktatura.
Megjithatë, në intervistën e dhënë për një të përditshme, ai ndan mendimin se përpara se të ndalohen këto filma, duhet të zbardhet e vërteta. Lidhur me debatin e kohëve të fundit mbi transmetimin ose jo të tyre, ai shprehet se përmes disa filmave të realizuara në ato vite, mund të tregohet se si diktatura i përdori këto ngjarje të dhimbshme dhe makabre.
“Për kategorinë e këtyre filmave që cenojnë, mund të shërbejë edhe sqarimi. Le të marrim filmin “Vitet e para”, meqë është një ndër më të diskutuarit. Mund edhe të mos shfaqen, por nëse do të shfaqen, atëherë një historian mund të shpjegojë se për cilët personazhe flet ky film dhe të tregojë historinë e vërtetë, se cilët kanë qenë ata, përse janë arrestuar e pushkatuar këta njerëz të shkolluar, që punonin për këtë vend.
Dhe kështu mund të tregosh se si diktatura e përdori këtë ngjarje të dhimbshme e makabre. Por nuk besoj se ka nevojë për shpjegim filmi “Hije që mbeten pas”, i realizuar pas vdekjes së Enver Hoxhës, që godet abuzimin, hajdutërinë te njerëz me pushtet dhe kundërshtitë brenda familjes”, është shprehur aktori ndër të tjera.
(XH.A/SHUPLAKA)
Discussion about this post