Ministria e Drejtësisë synon që të bëjë disa ndryshime në Kodin Penal, që përfshijnë lehtësira apo shtim të masës së dënimit për persona që kryejnë vepra të ndryshme penale.
Në draftin i cili sipas Etilda Gjonajt është drejt finalizimit, parashikohet të ketë lehtësira dhe për personat që kapen me hashash deri në 10 gramë, që tani e tutje do të konsiderohet për konsum personal.
Ndryshime të tjera ajo që vihet re në draftin e Kodit Penal, është dhe një ulje e lehtë e dënimit minimal për vrasjet si pasojë e gjakmarrjes. Sot ky krim dënohet nga 30 vite deri në burgim të përjetshëm, ndërsa në draft parashikohet të bëhet 25 vite deri në burgim të përjetshëm.
Vrasja me dashje e deputetit, gjyqtarit, prokurorit, avokatit, ushtarakut, punonjësve të policisë së shtetit apo e funksionarëve të tjerë publikë, gjatë detyrës ose për shkak të saj, kur cilësitë e viktimës janë të dukshme ose të njohura, dënohet me burgim jo më pak se 30 vjet ose me burgim të përjetshëm.
Ndërsa mësohet se krimet seksuale dhe aktiviteti për pornografinë do ketë rritje dënimi.
Për ndërtimin pa leje në tokën tënde për efekt strehimi sdo të ketë dënim e as arrestim, por vetëm gjobë. Ky kod i ri fut risinë edhe tek prostitucioni, ku ushtrimi s’do të konsiderohet më vepër penale por kundravajtje pa leje.
Vrasja e foshnjës e kryer me dashje nga nëna, gjatë ose menjëherë pas lindjes, dënohet me burgim nga 2 deri në 5 vjet. Të gjitha këto ndryshime janë ende në fazën e diskutimeve me grupet e interesit, dhe nuk dihet nëse do të mbërrijnë në Kuvend brenda seancave të këtij viti.
(E.K/Faxweb.al)
Discussion about this post