“Ndryshimi ekonomik është i domosdoshëm”, Jorida Tabaku: Familjet shqiptare po vuajnë koston e lartë të jetesës

Deputetja e Partisë Demokratike Jorida Tabaku, ngriti sot shqetësimin për vështirësitë ekonomike që po përjetojnë familjet shqiptare. Në një mesazh të publikuar në rrjetet sociale, Tabaku theksoi se rritja e çmimeve, kostoja e lartë e jetesës dhe mungesa e politikave lehtësuese kanë rënduar xhepat e qytetarëve, veçanërisht pensionistëve, familjeve të shtresës së mesme dhe të punësuarve.

Sipas Tabakut, një familje në Tiranë i nevojiten minimalisht 55 mijë lekë në muaj për të mbuluar shpenzimet bazë, një barrë e madhe për shumë prej tyre. Ajo nënvizoi se familjet me fëmijë përballen edhe me kosto shtesë, si ato për arsimin apo transportin, të cilat janë bërë edhe më të vështira për t’u mbuluar pas shtrenjtimit të karburantit dhe produkteve të shportës.

Deputetja demokrate e konsideroi këtë situatë si pasojë të një politike dymbëdhjetëvjeçare të qeverisë socialiste, që sipas saj nuk ka arritur të mbështesë realisht qytetarët. Ajo deklaroi se Partia Demokratike ofron një alternativë me taksa të thjeshta dhe një ekonomi që punon për të gjithë.

“Ndryshimi i sistemit është i vetmi opsion për t’u dhënë shqiptarëve një shpresë të re”, theksoi Tabaku, duke ftuar qytetarët të mbështesin këtë vizion përmes votës së tyre.

Ky mesazh i fortë i Jorida Tabakut synon të shënjestrojë vëmendjen te nevojat ekonomike të përditshme të çdo familjeje shqiptare, duke premtuar një qasje të re politike dhe ekonomike që do të lehtësonte ndjeshëm barrën financiare të qytetarëve.

Fjala e plotë:

Shqetësimi kryesor që ka kushdo sot – pensionist, shtresë e mesme, familjar apo i punësuar – është ekonomia. Është xhepi, është rritja e çmimeve.

A ia del dot sot një familje shqiptare me shpenzimet minimale prej 550 mijë lekësh në muaj, aq sa duhen për të jetuar në qytetin e Tiranës? A ia dalin dy pensionistë me këto të ardhura?

A ia del sot një familje e shtresës së mesme, me fëmijë, duke shtuar këtu kostot e tjera të jetesës, përfshirë arsimin, transportin, karburantin e rritur, ushqimet e shportës së rritura?

Kjo është ekonomia që ka krijuar dhe prodhuar qeveria socialiste në këto 12 vite. Këtë situatë do ta ndryshojmë me një sistem të thjeshtë taksash, me një ekonomi që punon për të gjithë dhe duke luftuar çdo ditë për më të mirën e familjeve shqiptare.

Kush është zgjidhja? Është ndryshimi i këtij sistemi. Është vota për Partinë Demokratike. Është vota për Jorida Tabakun!