Lojtari i PSG, Dani Alves ka habitur me deklaratën e dhënë për mediat lidhur me vdekjen e kapitenit të Fiorentinës, Davide Astori.
Si ish-lojtar i Juventusit, Dani Alves ka thënë se nuk është tronditur shumë nga lajmi sepse nuk e njihte shumë Astorin.
Më tej ai shtoi se me mijëra fëmijë vdesin çdo ditë nga uria dhe nuk u kushtohet një vëmendje e tillë.
“Nuk jemi tronditur shumë, sepse nuk e njihnim dhe aq. Jam i hidhëruar për familjen e tij. Mendoj se Davide bëri atë që duhej në këtë botë kaotike dhe se tani ndodhet në një botë më të mirë.
Por, në botë çdo ditë vdesin nga uria me mijëra fëmijë që nuk marrin një sensibilizim dhe vëmendje të tillë. Ndërkohë që janë po kaq të rëndësishëm.
Të gjithë duhet të vdesim herët a vonë, sepse jemi të përkohshëm. Mbase jemi të trishtuar, por absolutisht jo si familjarët e tij”, u shpreh Dani Alves.
